Charly Boy don chook mout for di matter wey dey between Lawyer, Deji Adeyanju, witi, Governor for Anambra State befor-befor wey be, Peter Obi.
Area Fada ask Adeyanju say, “Shame no dey catch you?” E come ask the lawyer join say, “You say Obi wan bribe you?”
Charly Boy tuk say, Adeyanju don put im mout for “where e no belong”, say, Obi nah person wey still get “small conscience” for inside Nigeria wey everytin don “spoil finish”.
Oga Charly tuk say, Obi nah person wey still make millions of Nigerians get hope say dis country go still beta, but, Adeyanju wey be lawyer, wey suppose “dey stand for truth” come “turn yourself to errand boy for chop money politics”.
Charly Boy tuk nah im response to one headline wey tuk say “Meet me in court – Adeyanju rejects Obi’s demand to retract defamation claims”.
For im reaction to di matter wey dey shele between Adeyanju and Obi on top X, Charly Boy tuk say: “Deji Adeyanju, na wa for you o!
“You don carry ya mouth waka go where e no belong. Na so so lie lie and yeye talk you dey yarn about Peter Obi, just to trend and please ya paymasters. Shame no dey catch you?
“Obi na man wey still get small conscience for this obodo wey don spoil finish. Na him still dey give millions of Nigerians hope say beta Nigeria dey possible. But you wey suppose dey stand for truth, you turn yourself to errand boy for chop money politics.
“You say Obi wan bribe you? Abeg park well jare! If dem wan see who dey sell himself for 30 pieces of silver, na you wey dey run upandan for crumbs.
“Area Fada dey talk am clear, we no go gree make you drag Obi inside gutter. If you no get respect, at least get small sense. This ya reckless and irresponsible behavior fit make you chop legal breakfast.
“We dey fight for new Nigeria, no be your yeye clout chasing.”
